ມັກງ່າຍພາເສຍຫາຍ
ວັນທີ 27/01/2012 - ເວລາ 16:18:49 
ໂດຍ: ໄພບູນ
ທ່ານຜູ້ອ່ານຄົນຫນຶ່ງບໍ່ປະສົງອອກນາມຮ້ອງຂໍຜ່ານສື່ມວນຊົນຊ່ວຍເປັນປາກກະບອກສຽງແທນການບອກເລົ່າຂອງຜູ້ເສຍຫາຍ ທີ່ຫນີບໍ່ພົ້ນຈາກນ້ຳມືຂອງຄົນບໍ່ດີເນື່ອງຈາກມີແນວຄິດມັກງ່າຍຈອດລົດໄວ້ຊະຊາຍ ກ່ອນຈະເຂົ້າໄປຊື້ເຄື່ອງບໍ່ພໍສິບນາທີອອກມາລົດບໍ່ເຫັນ.
ເຖິງແມ່ນບັນຫາລົດຈັກເສຍຈະເກີດຂຶ້ນຊ້ຳແລ້ວຊ້ຳເລົ່າ ຈົນກາຍເປັນບັນຫາຊ້ຳເຮື້ອໄປແລ້ວ ແຕ່ຄົນຈຳນວນຫນຶ່ງກໍ່ຍັງບໍ່ໄດ້ໃຫ້ຄວາມສົນໃຈເທົ່າທີ່ຄວນ ຈົນມາຮອດທີຂອງຕົນຖືກລັກ ໂດຍພວກຄົນບໍ່ດີຈິ່ງຮູ້ສຶກກິນແຫນງໃຈ ແລະ ຄິດເສຍດາຍ ທັງຢາກຢ້ອນເວລາກັບໄປແກ້ໄຂ ແຕ່ກໍ່ຊ້າໄປແລ້ວ ດັ່ງຜູ້ເສຍຫາຍຄົນຫນຶ່ງບໍ່ປະສົງອອກນາມໄດ້ເລົ່າສູ່ຜູ້ຂຽນຟັງວ່າ: ໃນມື້ເກີດເຫດຕົນເອງໄດ້ຂີ່ລົດຈັກຄູ່ຊີບທີ່ຫາກໍ່ຊື້ໃຫມ່ໄດ້ບໍ່ພໍສາມເດືອນມຸ່ງ ຫນ້າໄປສູ່ຮ້ານສັບພະສິນຄ້າແຫ່ງຫນຶ່ງ ພາຍໃນນະຄອນຫລວງວຽງຈັນ, ພໍຮອດຫນ້າຮ້ານກໍ່ຈອດລົດໄວ້ຕາມປົກກະຕິທີ່ເຄີຍຈອດໃນແຕ່ລະຄັ້ງທີ່ໄປຊື້ ເຄື່ອງຢູ່ຮ້ານແຫ່ງດັ່ງກ່າວ ເນື່ອງຈາກວ່າສະຖານທີ່ຮ້ານຕັ້ງຢູ່ແຄມທາງອີກດ້ານຫນຶ່ງວັນນັ້ນ ກໍ່ເປັນວັນພັກທາງລັດຖະການລົດກໍ່ບໍ່ຫລາຍປານໃດຈິ່ງເປັນເຫດເຮັດໃຫ້ຕົນເອງບໍ່ໄດ້ໃສ່ໃຈກັບມັນເທົ່າທີ່ຄວນ ເພາະຄິດວ່າພຽງແຕ່ລອັກກະແຈຄໍລົດກໍ່ຫນ້າຈະບໍ່ມີບັນຫາຫຍັງ, ປາມານສິບນາທີພາຍຫລັງທີ່ຊື້ເຄື່ອງຄົບຈຳນວນຕາມຕົນຕ້ອງການແລ້ວຈິ່ງຍ່າງອອກມາຈາກຮ້ານປາກົດວ່າບ່ອນທີ່ຕົນຈອດລົດໄວ້ນັ້ນ ພົບເຫັນແຕ່ຄວາມວ່າງເປົ່າ, ເວລາດຽວກັນນັ້ນ ຕົນກໍ່ໄດ້ສັງເກດທຸກທີທາງແຕ່ກໍ່ໄຮ້ຮ່ອງຮອຍ ກ່ອນຈະຕັດສິນໃຈເຂົ້າໄປແຈ້ງເຈົ້າຫນ້າທີ່ເພື່ອຕິດຕາມເພາະບາງທີຖ້າໂຊກດີກໍ່ຈະໄດ້ຄືນມາ ແຕ່ຈົນມາຮອດປະຈຸບັນນີ້ເວລາຜ່ານໄປເກືອບປີກວ່າແລ້ວກໍ່ບໍ່ມີວີ່ແວວຈະໄດ້ຮັບຂ່າວຄາວໃດໆ ຈິ່ງເຫລືອໄວ້ພຽງຄວາມກິນແຫນງໃຈອັນສະທ້ອນເປັນບົດຮຽນອັນລ້ຳຄ່າບໍ່ໃຫ້ຕົນກາຍເປັນຄົນມັກງ່າຍຕັ້ງແຕ່ບັດນັ້ນເປັນຕົ້ນມາ.
ນີ້ເປັນພຽງຄຳບອກເລົ່າຈາກບາງບຸກຄົນເທົ່ານັ້ນ, ໃນຄວາມເປັນຈິງແລ້ວພວກເຮົາເຄີຍໄດ້ຍິນໄດ້ຟັງກ່ຽວກັບບັນຫາດັ່ງກ່າວເປັນປະຈຳ, ຢ່າງໃດກໍ່ຕາມກໍ່ຮຽກຮ້ອງມາຍັງບັນດາຜູ້ນຳໃຊ້ລົດທຸກຄົນຈົ່ງມີສະຕິລະວັງຕົວ ເພາະຄົນບໍ່ດີມີຫລາຍຮູບແບບ ເຊິ່ງເຮົາບໍ່ສາມາດສັງເກດເບິ່ງອອກຈາກລັກສະນະພາຍນອກໄດ້, ສິ່ງສຳຄັນຢ່າເປັນຄົນມັກງ່າຍ, ຢ່າຄິດວ່າຂໍພຽງຈອດໄດ້ກໍ່ບໍ່ມີບັນຫາ, ທາງທີ່ດີຄວນຈັດຫາບ່ອນຈອດໃນທີ່ໆປອດໄພ, ຫລື ນຳໄປຝາກໄວ້ນຳພະນັກງານຮັບຝາກລົດ ເພາະຫລາຍບ່ອນໃນທີ່ຊຸມຊົນເພິ່ນກໍ່ມີການໃຫ້ການບໍລິການຮັບຝາກລົດທັງນີ້ກໍ່ເພື່ອຄວາມປອດໄພຂອງຊັບສິນຕົນເອງ ທັງປ້ອງກັນບໍ່ໃຫ້ເກີດຜົນເສຍຫາຍຕາມມາ.
ຮ່ວມມືສ້າງຄວາມເຂັ້ມແຂງໃນການຄຸ້ມຄອງ ບໍລິຫານຫໍສະຫມຸດທ້ອງຖິ່ນ (5)
ຂໍໃຫ້ເຊື່ອໃນເຫດ ແລະ ຜົນ (21)
ຕ້ອງມີຄວາມອົດທົນສູງ (10)
ເພງລາວ-ເພງສາກົນ (18)
ປ່ຽນວັນແຫ່ງຄວາມຮັກ ໃຫ້ກາຍເປັນວັນແຫ່ງການເສຍສະຫລະ ແລະ ສ້າງກຸສົນ (78)