ມ່ວນຊື່ນປີໃຫມ່ຊາວຫວຽດນາມ ແລະ ຊາວຈີນ ຄົນລາວກໍ່ເອົາດ້ວຍ
ວັນທີ 27/01/2012 - ເວລາ 16:13:19 
ໂດຍ: ຊາຍເມືອງອຸທຸມ
ເນື່ອງໃນເທດສະການ ບຸນປີໃຫມ່ຂອງພີ່ນ້ອງຊາວຫວຽດດນາມ ແລະ ຊາວຈີນທີ່ໄດ້ຫມູນວຽນມາບັນຈົບຄົບຮອບອີກວາລະຫນຶ່ງຄໍລຳສ່ອງແສງສັງຄົມຂໍຮ່ວມມ່ວນຊື່ນ ແລະ ສະແດງຄວາມຍິນດີ ພ້ອມທັງສົ່ງຄວາມສຸກນຳດ້ວຍ.
ແຕ່ຄໍລຳພວກເຮົາໄດ້ຮັບການສ່ອງແສງ ແລະ ໃຫ້ຂໍ້ສັງເກດກ່ຽວກັບຄົນລາວວ່າ: ຄົນ ລາວນີ້ຊ່າງເປັນຄົນມັກມ່ວນມັກກິນແທ້ວ່າຊັ້ນ, ບຸນອັນໃດ ເທດສະການອັນໃດ ຄົນລາວເຮົາກໍ່ຂໍເຂົ້າໄປມີສ່ວນຮ່ວມແບບເຖິງໃສເຖິງກັນ ບໍ່ເມົາ ແລະ ບໍ່ຫມົນແມ່ນບໍ່ເລີກ ອັນນີ້ມັນກໍ່ເບິ່ງໄດ້ສອງເບື້ອງຄືຫນຶ່ງຄົນລາວເປັນຄົນເຂົ້າກັບທຸກຄົນໄດ້ງ່າຍ, ອັນສອງຄົນລາວເປັນຄົນມັກຫມູ່ ມັກມ່ວນ ແລະ ມັກກິນ ພ້ອມທັງເປັນຄົນໃຈໃຫຍ່, ແຕ່ອັນທີ່ເຫັນວ່າບໍ່ຄ່ອຍຄັກປານໃດກໍ່ຄືບໍ່ຄ່ອຍຮູ້ຈັກປະຢັດ, ການໃຊ້ຈ່າຍຫລາຍກວ່າລາຍຮັບ, ເສຍເວລາໄປກັບການຫລິ້ນການກິນບໍ່ໃຊ້ເວລາໃຫ້ເປັນປະໂຫຍດລົດລາຍຈ່າຍ ເພີ່ມລາຍຮັບ, ຖ້າເມົາຂຶ້ນມາກໍ່ອາດຈະເສຍຄອບເສຍຄົວ ອັນນີ້ ຖ້າເຮົາຮູ້ຈັກປ່ຽນແປງຮູ້ຈັກເລືອກເຟັ້ນວ່າອັນໃດຄວນ ອັນໃດບໍ່ຄວນກໍ່ຈະເປັນການດີບໍ່ນ້ອຍ.
ເວົ້າມານີ້ ກໍ່ເປັນແຕ່ພຽງການແລກປ່ຽນ ເພາະວ່ານັບແຕ່ເວລານີ້ໄປ ກໍ່ເຕັມໄປແຕ່ງານບຸນງານເທດສະການຕ່າງໆ ມີແຕ່ແນວຊິເສຍເງິນ ເສຍເວລາ, ຖ້າຫາກເຮົາມີສະຕິມີຄວາມສຳນຶກ, ມີຄວາມກ້າປ່ຽນແປງວ່າອັນໃດຈະເປັນປະໂຫຍດອັນໃດຈະໃຫ້ໂທດເຮົາຄວນຢຸດຄິດ ແລະ ມີການຊັ່ງຊາໄລ່ລຽງຜົນໄດ້ຜົນເສຍເຮົາກໍ່ຈະມີແຕ່ອັນໄດ້ກັບໄດ້.
ຜ່ານມາເຮົາກໍ່ເຫັນພຶດຕິກຳ ນິດໄສໃຈຄໍ ຄວາມມັກມ່ວນມັກຊື່ນຂອງຄົນລາວຄືແນວນັ້ນ ແຕ່ກໍ່ບໍ່ໄດ້ຫມາຍຄວາມວ່າຈະເປັນຫມົດທຸກຄົນ, ບາງຄົນກໍ່ເຮັດໄປຕາມພິທີເຮັດພໍແລ້ວພິທີ, ແຕ່ບາງຄົນກໍ່ເມົາຈົນພິທີເລີກກໍ່ຍັງເມົາອັນນີ້ມັນກໍ່ພີລຶກໂພດ ແຕ່ກໍ່ມີຈຳນວນຫນ້ອຍ, ການສ່ອງແສງກັນກໍ່ເປັນແຕ່ພຽງໃຫ້ສະຕິ.
ການຕັ້ງບັນຫາຂຶ້ນມາສະເຫນີຄືແນວນີ້ ບໍ່ແມ່ນວ່າຜູ້ຂຽນຈະບໍ່ມັກມ່ວນມັກຊື່ນຈະເປັນຄົນບໍ່ມີສັງຄົມ ແຕ່ກໍ່ເວົ້າຕາມທີ່ເຫັນວ່າສົມຄວນຈະເວົ້າ ແລະ ກໍ່ເວົ້າພຽງເພື່ອເປັນການຖອດຖອນບົດຮຽນສຳລັບປີຕໍ່ໄປ.
ທ່ານຜູ້ອ່ານຈະວ່າແນວໃດ ຈະມີອັນໃດແລກປ່ຽນກໍ່ຍິນດີ.
ຮ່ວມມືສ້າງຄວາມເຂັ້ມແຂງໃນການຄຸ້ມຄອງ ບໍລິຫານຫໍສະຫມຸດທ້ອງຖິ່ນ (5)
ຂໍໃຫ້ເຊື່ອໃນເຫດ ແລະ ຜົນ (21)
ຕ້ອງມີຄວາມອົດທົນສູງ (10)
ເພງລາວ-ເພງສາກົນ (18)
ປ່ຽນວັນແຫ່ງຄວາມຮັກ ໃຫ້ກາຍເປັນວັນແຫ່ງການເສຍສະຫລະ ແລະ ສ້າງກຸສົນ (78)