ຮ້ານເບຍເກີດຫລາຍ ແຕ່ຮ້ານຂາຍປຶ້ມຂາດແຄນ
ວັນທີ 24/01/2012 - ເວລາ 08:54:28 
ໂດຍ: ໄພບູນ
ເປັນປະເດັນຂຶ້ນມາຕື່ມອີກອັນຫນຶ່ງ ສຳລັບສຽງວິພາກວິຈານໃນທາງທີ່ສ້າງສັນຂອງແວດວົງຄົນໃນສັງຄົມບ້ານເຮົາກ່ຽວກັບບັນຫາທີ່ວ່າ ປະຈຸບັນນີ້ ສັງຄົມບ້ານເຮົາເລີ່ມມີຫລາຍສິ່ງຫລາຍຢ່າງທີ່ແຕກຕ່າງ ເວົ້າສະເພາະກໍ່ແມ່ນຄວາມຈະເລີນສີວິໄລ, ການກໍ່ສ້າງອາຄານໃຫມ່, ລວມທັງຖະຫນົນຫົນທາງ ແລະ ອື່ນໆແຕ່ອັນພົ້ນເດັ່ນກໍ່ຄືບັນດາຮ້ານຕ່າງໆນັ້ນເອງ.
ຈາກຫລາຍຫາງສຽງຈົ່ມມາວ່າ ປະຈຸບັນຮ້ານນ້ອຍຮ້ານໃຫຍ່ລວມທັງບັນດາຮ້ານຂາຍເຫລົ້າຂາຍເບຍ ເລີ່ມປົ່ງຊອນຂຶ້ນຄືດອກເຫັດວ່າຊັ້ນ ແຕ່ບັດຈະໄປຊອກຫາຊື້ປຶ້ມດີໆ ຄືປຶ້ມທີ່ໃຫ້ ຄວາມຮູ້ດີໆນັ້ນປານໄປຊອກຫາເມັດຄຳຕົກເຮ່ຍຢູ່ບ່ອນໃດບ່ອນຫນຶ່ງ, ເພາະຊອກຊື້ຍາກເອົາແທ້ເອົາວ່າ ແຕ່ກົງກັນຂ້າມ ພໍແຕ່ເອີ່ຍປາກຊວນກັນໄປສັງສັນຊຸມແຊວ ປາກົດວ່າບໍ່ຍາກເລີຍ ເພາະຮ້ານບັນເທິງມີຢູ່ໃກ້ໆ ເກທອບວ່າມີຢູ່ທຸກຫມູ່ບ້ານ ເວົ້າສະເພາະແມ່ນເຂດຕົວເມືອງໃຫຍ່, ມາສັງເກດເບິ່ງຕົວຈິງແລ້ວ ກໍ່ຄືຄວາມເພິ່ນວ່າແທ້, ຜູ້ປະກອບການບາງຄົນເພີ່ນມັກເວົ້າວ່າ ຄົນລາວບໍ່ມັກອ່ານປຶ້ມ, ເຫດນັ້ນເອງ ຈິ່ງບໍ່ມີໃຜຢາກສ້າງຕັ້ງທຸລະກິດນີ້ຂຶ້ນມາ, ແຕ່ເວົ້າເລື່ອງການສ້າງສັນກັນນັ້ນເປັນເລື່ອງທຳມະດາຢູ່ແລ້ວເພາະຢູ່ປະເທດໃດກໍ່ມີວ່າຊັ້ນ, ສ່ວນຫນຶ່ງທີ່ເພິ່ນເວົ້າມາກໍ່ມີທັງອັນຖືກ ແລະ ອັນຜິດນໍ, ເຖິງແມ່ນວ່າຄົນລາວຈະບໍ່ມັກອ່ານ ແຕ່ຍັງມີຫລາຍຄົນທີ່ຕ້ອງການປຶ້ມດີໆມີປະໂຫຍດ, ບໍ່ພຽງ ແຕ່ພາກັນອ່ານແລ້ວ ເກີດຄວາມເພີດເພີນໃຈແຕ່ກົງກັນຂ້າມ ເມື່ອອ່ານແລ້ວຍັງໄດ້ຮັບຄວາມຮູ້ ແລະ ຄຸນປະໂຫຍດຫລາຍຢ່າງ, ເມື່ອມາເບິ່ງຜົນຂອງການເກີດບັນຫາຕ່າງໆຕາມມາ ຈາກສະຖານທີ່ຮ້ານບັນເທິງ ແມ່ນມີຫລາຍຢ່າງ ບໍ່ວ່າຈະເປັນການຄ້າໂສເພນີ, ບັນຫາຄອບຄົວ, ບັນຫາອຸບັດເຫດຍ້ອນດື່ມເມົາ ແລ້ວຂັບລົດ ແລະບັນຫາອື່ນໆ, ແຕ່ນີ້ກໍ່ບໍ່ໄດ້ຫມາຍຄວາມວ່າ ຈະຖິ້ມໂທດໃສ່ຝ່າຍໃດຝ່າຍຫນຶ່ງ ແຕ່ຫາກ ເວົ້າຕາມສິ່ງທີ່ຫລາຍຄົນມີຄວາມເຫັນນຳກັນ.
ແນວໃດກໍ່ຕາມ ສິ່ງທີ່ຜູ້ສຂຽນເວົ້າເທິງນີ້ ບໍ່ໄດ້ຫມາຍເຖິງຈະເຂົ້າຂ້າງອອກຂາຝ່າຍໃດພຽງ ແຕ່ຍົກບັນຫານີ້ຂຶ້ນມາໃຫ້ທຸກຄົນຊ່ວຍກັນຕຶກຕອງເບິ່ງທີ່ຜ່ານມາກໍ່ຂໍຊົມເຊີຍທາງພາກສ່ວນກ່ຽວຂ້ອງເພີ່ນກໍ່ໄດ້ພະຍາຍາມຕິດຕາມກວດກາຢ່າງໃກ້ຊິດ ທັງວາງມາດຕະການຕໍ່ຜູ້ປະກອບການຮ້ານບັນເທິງແຫ່ງຕ່າງໆ ພາຍໃນເວົ້າສະເພາະນະຄອນຫລວງວຽງຈັນ ສ່ວນຢູ່ເຂດຕ່າງ ແຂວງນັ້ນ ບາງແຫ່ງຍັງມີປາກົດການຫຍໍ້ທໍ້ເກີດຂຶ້ນ ສະນັ້ນ ຈິ່ງຮຽກຮ້ອງມາຍັງທຸກພາກສ່ວນຈົ່ງເບິ່ງຄືນຕໍ່ກັບບັນຫານີ້.
ຮ່ວມມືສ້າງຄວາມເຂັ້ມແຂງໃນການຄຸ້ມຄອງ ບໍລິຫານຫໍສະຫມຸດທ້ອງຖິ່ນ (5)
ຂໍໃຫ້ເຊື່ອໃນເຫດ ແລະ ຜົນ (22)
ຕ້ອງມີຄວາມອົດທົນສູງ (10)
ເພງລາວ-ເພງສາກົນ (18)
ປ່ຽນວັນແຫ່ງຄວາມຮັກ ໃຫ້ກາຍເປັນວັນແຫ່ງການເສຍສະຫລະ ແລະ ສ້າງກຸສົນ (78)