ກຸ່ມບ້ານໂພນສະອາດ ກຽມພັດທະນາເປັນຕົວເມືອງນ້ອຍ
ວັນທີ 27/01/2012 - ເວລາ 05:13:17 
ກຸ່ມພັດທະນາໂພນສະອາດເລ່ງສ້າງແຜນແມ່ບົດ ຫັນບ້ານໃຫ້ກາຍເປັນບ້ານໃຫຍ່ພັດທະນາຕົວເມືອງນ້ອຍແບບຢ່າງແຫ່ງທຳອິດຢູ່ເມືອງພຽງ ແຂວງໄຊຍະບູລີ.
ເວທີຫາລືການສ້າງແຜນແມ່ບົດໄດ້ຈັດຂຶ້ນໃນຕອນແລງວັນພະຫັດຜ່ານມາ ທີ່ຫ້ອງວ່າການປົກຄອງເມືອງພຽງ ໂດຍການເຂົ້າຮ່ວມຂອງທ່ານ ດຣ. ລຽນ ທິແກ້ວ ກຳມະການສູນກາງພັກເລຂາພັກແຂວງ ເຈົ້າແຂວງໆໄຊຍະບູລີ, ມີທ່ານ ສຈ. ດຣ. ສຸກກົງແສງ ໄຊຍະເລີດ ກຳມະການສູນກາງພັກ ອະທິການບໍດີມະຫາວິທະຍາໄລແຫ່ງຊາດ ພ້ອມວິຊາການກ່ຽວຂ້ອງເຂົ້າຮ່ວມ.
ທ່ານ ເພັງນິລັດ ຄຳພັນເພັງ ເຈົ້າເມືອງໆພຽງໄດ້ກ່າວໂດຍ ຫຍໍ້ກ່ຽວກັບສະພາບຈຸດພິເສດຂອງເມືອງໃຫ້ຜູ້ເຂົ້າຮ່ວມໄດ້ຮັບຊາບ ໂດຍເລັງໃສ່ກຸ່ມບ້ານພັດທະນາໂພນສະອາດ, ເຊິ່ງປະກອບມີ 11 ບ້ານ, 153 ຫນ່ວຍ ຄຸ້ມຄອງ, 2.013 ຄອບຄົວ, ພົນ ລະເມືອງທັງຫມົດ 10.280 ກວ່າຄົນ ຍິງ 5.380 ກວ່າຄົນ, ມີ 6 ຫນ່ວຍພັກ, ສະມາຊິກທັງຫມົດ 160 ກວ່າສະຫາຍ, ຍິງ 20 ກວ່າສະຫາຍ.
ກຸ່ມບ້ານດັ່ງກ່າວເປັນເຂດທີ່ມີຄວາມອຸດົມສົມບູນທາງດ້ານຊັບພະຍາກອນທຳມະຊາດ ເພື່ອການທ່ອງທ່ຽວເຊັ່ນ: ຕົ້ນຂ່າໃຫຍ່, ນ້ຳປຸ້ນ, ປະຊາຊົນກໍ່ມີມູນເຊື້ອດຸຫມັ່ນຂະຫຍັນພຽນໃນ ການປູກຝັງ-ລ້ຽງສັດເປັນອາຊີບຕົ້ນຕໍ, ປະຈຸບັນ ມີເນື້ອທີ່ນາ 600 ກວ່າເຮັກຕາ, ປູກພືດລະດູແລ້ງ 22 ເຮັກຕາ ໂດຍສະເພາະແມ່ນການປູກສາລີ, ສະເລ່ຍລາຍຮັບໄດ້ 750 ໂດລາສະຫະລັດຕໍ່ຄົນຕໍ່ປີ, ສະເລ່ຍເຂົ້າກິນໄດ້ 537 ກິໂລກຣາມຕໍ່ຄົນຕໍ່ປີ, ມີພຽງ 33 ຄອບຄົວທີ່ຍັງທຸກຍາກ, ທ່ານ ເພັງນິລັນ ຄຳພັນເພັງ ກ່າວ.
ໃນໂອກາດນີ້ທ່ານ ສຈ. ດຣ. ສຸກກົງແສງ ໄຊຍະເລີດ ໄດ້ໃຫ້ຄຳຫມັ້ນສັນຍາວ່າ: ຈະໃຫ້ການຊ່ວຍເຫລືອແຂວງໄຊຍະບູລີໃນການເກັບກຳຂໍ້ມູນສຶກສາຄົ້ນຄວ້າເພື່ອຂຽນແຜນແມ່ບົດພັດທະນາເສດຖະກິດ-ສັງຄົມຂອງກຸ່ມບ້ານໂພນສະອາດໃຫ້ສຳເລັດໃນເດືອນເມສາປີນີ້ ພ້ອມທັງຄົ້ນຄວ້າຊອກຫາແຫລ່ງທຶນ ແລະ ອຳນວຍຄວາມສະດວກໃນການພັດທະນາຊັບພະຍາກອນມະນຸດ ເພື່ອເປັນກຳລັງແຮງພັດທະນາກຸ່ມບ້ານໂພນສະອາດໃຫ້ກາຍເປັນຕົວເມືອງນ້ອຍຊົນນະບົດໃຫ້ໄດ້ໃນປີ 2014.
2011 ອຸບັດເຫດສ້າງຄວາມເສຍຫາຍໃຫ້ເມືອງໄຊຍະບູລີ 900 ກວ່າລ້ານ (11)
ຮຸ້ນປິດບໍ່ປ່ຽນແປງ (7)
ກ້າວເປັນວິທະຍາໄລພອນສະຫວັນ ບໍລິຫານທຸລະກິດຢ່າງເຕັມຕົວ (8)
ສະຖາບັນການຕ່າງປະເທດຮຽນຮູ້ກ່ຽວກັບອາເຊມ (14)
ທະນາຄານທຸລະກິດ 4 ແຂວງພາກເຫນືອ ຮ່ວມສໍາມະນາບັນຫາການຟອກເງິນ (6)