ສົກນີ້ ອົດສະຕຣາລີ ຊ່ວຍເຫລືອລາວ 42,1 ລ້ານໂດລາ
ວັນທີ 27/01/2012 - ເວລາ 16:59:07 
ໂດຍ:ຈຽງສັກ
ຕະຫລອດໄລຍະ 60 ປີ ແຫ່ງສາຍພົວພັນການທູດລະຫວ່າງສອງຊາດລາວ-ອົດສະຕຣາລີສອງປະເທດຕ່າງກໍ່ໄດ້ໃຫ້ການຮ່ວມມືສະຫນັບສະຫນູນ ເຊິ່ງກັນ ແລະ ກັນໃນເວທີສາກົນ ແລະ ພາກພື້ນ, ລັດຖະບານອົດສະຕຣາລີໄດ້ຊ່ວຍເຫລືອລາວໃນຫລາຍດ້ານ ໂດຍສະເພາະການສຶກສາ, ການຄ້າ-ການລົງທຶນ ແລະ ພັດທະນາຊົນນະບົດ.
ຂໍ້ມູນໃຫ້ຮູ້ໃນໂອກາດງານສະເຫລີມສະຫລອງວັນສ້າງຕັ້ງສາຍພົວພັນການທູດຄົບຮອບ 60 ປີ ໃນວັນທີ 26 ມັງກອນຜ່ານມາແຈ້ງວ່າ ເລີ່ມແຕ່ສ້າງສາຍພົວພັນການທູດລະຫວ່າງ ລາວ-ອົດສະຕຣາລີລັດຖະບານອົດສະຕຣາລີໄດ້ໃຫ້ການສະຫນັບສະຫນູນຊ່ວຍເຫລືອລ້າແກ່ລາວຕະຫລອດມາສາມາດບັນລຸເປົ້າຫມາຍສະຫັດສະວັດດ້ານການພັດທະນາໃນປີ 2020 ໂດຍ ປີ 2004 ໃຫ້ທຶນກໍ່ສ້າງຂົວມິດຕະພາບຂ້າມແມ່ນ້ຳຂອງແຫ່ງທຳອິດລະຫວ່າງລາວ-ໄທທີ່ໃຊ້ງົບປະມານ 40 ກວ່າລ້ານໂດລາອົດສະຕຣາລີ, ໄລຍະຕໍ່ມາ ໂດຍອີງຕາມແຜນຍຸດທະສາດ ການຮ່ວມມືໄລຍະຍາວລະຫວ່າງ ສປປ ລາວ ແລະ ອົດສະຕຣາລີ ໄດ້ເນັ້ນໃສ່ພັດທະນາ 3 ດ້ານຄື: ດ້ານການສຶກສາ, ການຄ້າ-ການລົງທຶນ ແລະ ການພັດທະນາຊົນນະບົດ.
ສຳລັບສົກປີ 2010-2011 ມີມູນຄ່າການຊ່ວຍເຫລືອຂອງລັດຖະບານອົດສະຕຣາລີແກ່ລາວມີປະມານ 41 ລ້ານໂດລາ ອົດສະຕຣາລີ ແລະ ການຮ່ວມມືການຄ້າສອງຝ່າຍທີ່ລາວສາ ມາດສົ່ງສິນຄ້າໄປອົດສະຕຣາລີ ມູນຄ່າ 2 ລ້ານໂດລາສະຫະລັດ ແລະ ນຳເຂົ້າສິນຄ້າຈາກອົດສະຕຣາລີມີມູນຄ່າ 24,7 ລ້ານໂດລາສະຫະລັດ.
ປະຈຸບັນ ສາຍພົວພັນການຮ່ວມມືລະຫວ່າງສອງຊາດຍິ່ງມີຄວາມແຫນ້ນແຟ້ນຍິ່ງຂຶ້ນ ໂດຍຈຸດປະສົງຫລັກແມ່ນເພື່ອພັດທະນາ 4 ຂົງເຂດວຽກງານຄື: ສົ່ງເສີມການສຶກສາຂັ້ນພື້ນຖານ (ປະຈຸບັນມີນັກສຶກສາທີ່ໄດ້ຮັບທຶນ ແລະ ຮຽນຈົບມາແລ້ວປະມານ 1000 ກວ່າຄົນ), ສົ່ງເສີມການຄ້າ-ການລົງທຶນໃນຂົງເຂດທີ່ມີສ່ວນຮ່ວມໃນການຫລຸດ ຜ່ອນຄວາມທຸກຍາກ ແລະ ເສີມສ້າງຄວາມເຂັ້ມແຂງໃນວຽກງານບໍລິຫານຄຸ້ມຄອງຊັບພະຍາກອນທຳມະຊາດ ໂດຍໃຫ້ທຶນການຊ່ວຍເຫລືອໃນມູນຄ່າ 42,1 ລ້ານໂດລາອົດສະຕຣາລີ.
ເພື່ອຮັດແຫນ້ນຄວາມສາມັກຄີລະຫວ່າງສອງຊາດ, ໃນວັນພະຫັດຜ່ານມາ, ທີ່ສະຖານທູດອົດສະຕຣາລີໄດ້ຈັດພິທີສະເຫລີມສະຫລອງວັນຊາດພ້ອມໆ ກັບການສະເຫລີມສະຫລອງວັນ ສ້າງຕັ້ງສາຍພົວພັນການທູດລະຫວ່າງລາວ-ອົດສະຕຣາລີ ຄົບຮອບ 60 ປີ, ເປັນກຽດເຂົ້າຮ່ວມງານຄັ້ງນີ້ໂດຍ ທ່ານ ດຣ. ທອງ ລຸນ ສີສຸລິດ ຮອງນາຍົກລັດຖະມົນຕີ ລັດຖະມົນຕີວ່າການກະຊວງການຕ່າງປະເທດ, ມີຄະນະນຳສະຖານທູດຕ່າງໆປະຈຳລາວ ແລະ ແຂກຈາກພາກສ່ວນຕ່າງໆທັງພາຍໃນ ແລະ ຕ່າງປະເທດເຂົ້າຮ່ວມ.
2011 ອຸບັດເຫດສ້າງຄວາມເສຍຫາຍໃຫ້ເມືອງໄຊຍະບູລີ 900 ກວ່າລ້ານ (11)
ຮຸ້ນປິດບໍ່ປ່ຽນແປງ (7)
ກ້າວເປັນວິທະຍາໄລພອນສະຫວັນ ບໍລິຫານທຸລະກິດຢ່າງເຕັມຕົວ (8)
ສະຖາບັນການຕ່າງປະເທດຮຽນຮູ້ກ່ຽວກັບອາເຊມ (14)
ທະນາຄານທຸລະກິດ 4 ແຂວງພາກເຫນືອ ຮ່ວມສໍາມະນາບັນຫາການຟອກເງິນ (6)