ກຽມໃຊ້ເງິນໃບ 100.000 ກີບໃຫມ່ໃນ 1 ກຸມພານີ້
ວັນທີ 26/01/2012 - ເວລາ 08:59:05 
ຂ່າວ: ພະນອມໄພ
ທະນາຄານແຫ່ງ ສປປ ລາວ ຫລື ທຫລ ຈະນຳທະນະ ບັດໃຫມ່ໃບ 100.000 ກີບ ອອກຈໍລະຈອນສູ່ສັງຄົມ ເລີ່ມແຕ່ວັນທີ 1 ກຸມພາ 2012 ເປັນຕົ້ນໄປ ເພື່ອສະຫນອງຄວາມຕ້ອງການພື້ນຖານຂອງເສດຖະກິດທີ່ນັບມື້ເຕີບໂຕ ພ້ອມຈະສ້າງຄວາມສະດວກໃນການຊຳລະສິນຄ້າລວມທັງການບໍລິການ.
ວານນີ້ທີ່ທະນາຄານແຫ່ງ ສປປ ລາວ ນະຄອນຫລວງວຽງຈັນ ທ່ານ ສຸພັດ ໂຄດໂຍທາ ຫົວຫນ້າກົມເງິນຕາ-ຄັງສາງທະນາຄານແຫ່ງ ສປປ ລາວ ໄດ້ອອກຖະແຫລງຕໍ່ສື່ມວນຊົນວ່າ: ປະຈຸບັນ ທຫລ ກຳລັງກຽມນຳເອົາທະນະບັດໃຫມ່ໃບ 100.000 ກີບ ອອກມາສູ່ຂອດຈໍລະຈອນ ໂດຍ ຈະເລີ່ມແຕ່ວັນທີ 1 ກຸມພາ 2012 ນີ້ເປັນຕົ້ນໄປ.
ການຈະນຳເອົາທະນະບັດດັ່ງກ່າວ ອອກມານຳໃຊ້ແມ່ນອີງໃສ່ແຈ້ງການຂອງທ່ານລັດຖະມົນຕີ ຫົວຫນ້າຫ້ອງການລັດຖະບານເລກທີ 26/ຫລບ.ກລຂ ລົງວັນທີ 5 ມັງກອນ 2012 ກ່ຽວກັບການອະນຸຍາດພິມຈຳຫນ່າຍເງິນປະເພດໃບ 100.000 ກີບ ອອກສູ່ຂອດຈໍລະຈອນ
ການຈັດພິມທະນະບັດໃຫມ່ໃນທີ່ນີ້ນັບເປັນໃບທີສອງຂອງ ສປປ ລາວ ສຳລັບເງິນໃບ 100.000 ກີບ ໂດຍເງິນໃບທຳອິດແມ່ນໄດ້ຈັດພິມອອກມາໃນລະຫວ່າງທ້າຍປີ 2010 ແຕ່ກໍ່ ເປັນເງິນທີ່ຜະລິດຢູ່ໃນຂອບເຂດທີ່ຈຳກັດ ເນື່ອງຈາກຈັດພິມອອກ ເພື່ອເປັນທີ່ລະນຶກໃນງານສະເຫລີມສະຫລອງວັນສ້າງຕັ້ງວຽງຈັນເປັນນະຄອນຫລວງ ຄົບຮອບ 450 ປີທ່ານ ສຸພັດ ໂຄດໂຍທາ ກ່າວ.
ແນວໃດກໍ່ດີ ຫົວຫນ້າກົມເງິນຕາ-ຄັງສາງກ່າວວ່າ: ສະເພາະເງິນໃບ 100.000 ກີບ ທີ່ຈະຜະລິດອອກມາໃຫມ່ນີ້ ແມ່ນເພື່ອຕອບສະຫນອງໄດ້ຄວາມຮຽກຮ້ອງຕ້ອງການຂອງການພັດທະນາເສດຖະກິດ-ສັງຄົມຂອງປະເທດທີ່ນັບມື້ເຕີບໃຫຍ່ຂະຫຍາຍຕົວ, ປະຕິບັດນະໂຍບາຍສົ່ງເສີມການນຳໃຊ້ເງິນກີບ, ສ້າງເງື່ອນໄຂ ແລະ ສີ່ງເອື້ອອຳນວຍໃຫ້ແກ່ການຊຳລະສະສາງສິນຄ້າ ແລະ ບໍລິການ, ການພົກພາຕິດຕົວສຳລັບການໃຊ້ຈ່າຍປະຈຳວັນ ໂດຍທະນະບັດໃຫມ່ນີ້ຈະນຳໃຊ້ຄຽງຄູ່ເງິນປະເພດອື່ນໆທີ່ມີໃນປະຈຸບັນ ລວມທັງທະນະບັດທີ່ລະນຶກໃບ 100.000 ກີບ ທີ່ຜະລິດອອກກ່ອນຫນ້ານັ້ນ.
ທະນະບັດໃບໃຫມ່ນີ້ ແມ່ນມີມູນຄ່າສູງສຸດຂອງລາວທີ່ຈັດພິມດ້ວຍເຈ້ຍພິເສດມີຄຸນນະພາບສູງມີລະບົບປ້ອງກັນການປອມແປງທີ່ມີຄຸນນະພາບສູງ, ສະທ້ອນແສງມີຄວາມຫມັ້ນຫນຽວ ທົນທານຕໍ່ສະພາບອົບເອົ້າມີຮູບຄວັດລາຍນ້ຳ (ແບບເຄິ່ງຄີງ ທ່ານປະທານ ໄກສອນ ພົມວິຫານ) ສາມາດສ່ອງຊອດໄດ້ທັງສອງຂ້າງ, ມີເສັ້ນນິລະໄພ ແລະ ເສັ້ນໃຍສົງເຄາະທີ່ຮັບປະກັນບັນຈຸເຂົ້າໃນເຈ້ຍຕາມຈຸດຕ່າງໆ.
ສິ່ງທີ່ສຳຄັນຈະສະທ້ອນແສງອອກເປັນສີທີ່ແຕກຕ່າງກັນພາຍໃຕ້ແສງລັງສີ, ພິມດ້ວຍສີ ແລະ ນ້ຳມຶກພິເສດຕ້ານຕໍ່ການອັດສຳເນົາ ແລະ ສະແກນເຊັ່ນ: ນ້ຳມຶກໂລຫະ, ນ້ຳມຶກແມ່ເຫລັກທີ່ສາມາດສະທ້ອນແສງອອກ ເມື່ອຖືກແສງໄຟ ຢູວີ ມີຈຸດພິເສດ ຕົວຫນັງສືນ້ອຍ (MicroText) ຢູ່ທົ່ວໃບເງິນ.
ທ່ານ ສຸພັດ ໂຄດໂຍທາ ໃຫ້ ຮູ້ຕື່ມວ່າ: ຮູບພາບທີ່ໄດ້ຈັດພິມລົງໃບ 100.000 ກີບ ແມ່ນສ່ອງແສງເຖິງລັກສະນະຊາດປະຫວັດສາດ ແລະ ວັດທະນາທຳຂອງຊາດລາວດ້ານຫນ້າມີຮູບທ່ານປະທານ ໄກສອນ ພົມວິ ຫານ, ເຄື່ອງຫມາຍກາຊາດ, ຮູບພະທາດຫລວງ ແລະ ຮູບລວດລາຍສິລະປະກຳຂອງລາວເຮົາ.
ສ່ວນວ່າດ້ານຫລັງມີຮູບຫໍພິພິທະພັນ ໄກສອນ ພົມວິຫານ ແລະ ມີຮູບລວດລາຍສິລະປະກຳຂອງຊາດລາວເຮົາ.
2011 ອຸບັດເຫດສ້າງຄວາມເສຍຫາຍໃຫ້ເມືອງໄຊຍະບູລີ 900 ກວ່າລ້ານ (12)
ຮຸ້ນປິດບໍ່ປ່ຽນແປງ (7)
ກ້າວເປັນວິທະຍາໄລພອນສະຫວັນ ບໍລິຫານທຸລະກິດຢ່າງເຕັມຕົວ (8)
ສະຖາບັນການຕ່າງປະເທດຮຽນຮູ້ກ່ຽວກັບອາເຊມ (15)
ທະນາຄານທຸລະກິດ 4 ແຂວງພາກເຫນືອ ຮ່ວມສໍາມະນາບັນຫາການຟອກເງິນ (6)